WEST RAND RACING PIGEON ASSOCIATION

 

 

 

 

 

 

 

 

 

 

 

 

 

1.    NAAM:

 

            Die naam van die Assosiasie is die:

West Rand Racing Pigeon Association (WRRPA)

       Verder in hierdie Konstitusie sal na die WRRPA as die Assosiasie verwys word.

 

2.     WOORDOMSKRYWING:

 

2.1       Geaffilieerde Klub

            ‘n Geaffilieerde Klub beteken ‘n wedvlugduiweklub, soos omskryf onder lidmaatskap, wat by die Assosiasie geaffilieer is.

 

2.2       Geaffilieerde Lede:

            Geaffilieerde lede beteken daardie lede wat lid is van ‘n klub wat by die Assosiasie geaffilieer is.

 

2.3       Junior Lede:

            Junior Lede is studente/skoliere onder 18 jaar oud wat lid is van een van die geaffilieerde klubs.

 

2.4       Kompeterende Lede:

            Kompeterende Lede is Lede wat by een van die geaffilieerde klubs aktief aan wedvlugte deelneem.

 

2.5       Bestuurskomitee:

            Die Bestuurskomitee is die verkose verteenwoordigende en besluitnemende liggaam van die Assosiasie.

 

2.6       Dagbestuur:

            Die Dagbestuur word saamgestel uit lede van die Bestuurskomitee en die verkose Voorsitter van die Assosiasie.

 

2.7       Ampsdraers:

            Die Ampsdraers van die Assosiasie is die Voorsitter en die verkose verteenwoordigers van die klubs wat op die Dagbestuur dien.

 

2.8       Algemene Jaarvergadering:

            Die Algemene Jaarvergadering is ‘n vergadering van die Assosiasie wat jaarliks voor die einde Februarie moet plaasvind en waarop alle geaffilieerde lede van die Assosiasie sitting het.

 

 

 

2.9       Buitengewone Algemene Vergadering:

            ‘n Buitengewone Algemene Vergadering is ‘n vergadering wat spesiaal skriftelik aangevra word en waarop slegs die aangeleentheid waarvoor die vergadering belê is, bespreek mag word.

 

2.10     Finansiële Jaar:

            Die Finansiële Jaar van die Assosiasie strek van 01 Februarie tot 31 Januarie.

 

2.11      Werknemer:

            ‘n Werknemer van die Assosiasie is ‘n persoon wat teen ‘n voorafbepaalde salaris of loon deur die dagbestuur in diens geneem is.

 

2.12     Kworum:

            Op al die vergaderings van die Assosiasie sal die stemgeregtigde lede wat teenwoordig is, ‘n kworum vorm.

 

3.     DOELWIT

            Die Assosiasie se doelwitte is die volgende:

 

3.1       Om belangstelling in wedvlugduiwe onder die breë publiek te bevorder, aan te moedig en in die algemeen bystand en beskerming daaraan te verleen.

 

3.2       Om reëls neer te lê vir die organiseer van duiweskoue en –wedvlugte.  Bestaande reëls te wysig, herroep, aan te vul, beheer daaroor uit te oefen en indien nodig, die nakoming daarvan af te dwing.

 

3.3       Om wetgewende maatreëls te bevorder of om die Sentrale-, Provinsiale- of Plaaslike Owerhede of ander instellings te nader in verband met enige aangeleentheid wat duiwevlugte of –skoue direk of indirek raak of beïnvloed.

 

3.4       Om besluite te neem wat deur die bestuurskomitee as noodsaaklik beskou word in belang van die Assosiasie en dit uit te voer of te laat uitvoer solank dit net nie met die bepalings van die Konstitusie bots nie; en

 

3.5       Om die fondse van die Assosiasie spaarsaam en tot die beste voordeel van sy lede aan te wend.

 

4.     GRENSE

            Die grense van die Assosiasie sluit die munisipale gebiede van Fochville, Carletonville, Westonaria, Randfontein, Krugersdorp, Rustenburg, Brits, Magaliesburg en Hartebeespoort in.  In uitsonderlike gevalle sal aansoeke om lidmaatskap binne die landdrosdistrikte van bogenoemde dorpe op meriete oorweeg word.

 

 

 

 

5.     LIDMAATSKAP

 

5.1       Aansoek om lidmaatskap van voornemende klubs moet skriftelik aan die Sekretaris van die Assosiasie gerig word.  Die Assosiasie behou hom die reg voor om enige aansoek sonder ‘n opgaaf van redes te weier.  Indien ‘n aansoek nie goedgekeur word nie, kan dieselfde klub nie weer binne ses maande aansoek doen nie.

 

5.2       Lidmaatskap sal aan geen klub of persoon buite die Assosiasie se grense toegestaan word nie.

 

5.3       Ten einde vir lidmaatskap te kwalifiseer moet ‘n klub binne die grense van die Assosiasie geleë wees en uit ten minste ses kompeterende nie-verwante lede bestaan waarvan minstens vyf lede teenwoordig moet wees en aktief moet deelneem wanneer duiwe ingekorf of klokke gelees word.  Junior lede is nie by genoemde getalle ingesluit nie.

 

5.4       Junior lede moet skriftelike toestemming van hulle ouers of voog verkry voordat ‘n geaffilieerde klub hulle mag aanneem.  In die toestemmingsbrief moet die ouer/voog uitdruklik aanspreeklikheid vir die junior lid se Finansiële verpligtinge aanvaar.

 

5.5       Indien ‘n tweede klub binne ‘n dorp om lidmaatskap aansoek doen, moet dit met die goedkeuring van die bestaande klub geskied.

 

5.6       ‘n Lid of klub wat by die Assosiasie geaffilieer is, wat die Konstitusie of die reëls uitgevaardig kragtens die Konstitusie, doelbewus verontagsaam, kan deur die Bestuurskomitee gediskwalifiseer of geskors word en sal al die voorregte van lidmaatskap van die Assosiasie verbeur.

 

5.7       Geen klub of lid mag geskors of sy lidmaatskap opgesê word voordat so ‘n klub of lid nie die geleentheid gegun is om sy kant van die saak te stel nie.

 

6.     BESTUURSKOMITEE

 

            Die Bestuurskomitee sal bestaan uit:

            ‘n Voorsitter wat deur die Algemene Jaarvergadering verkies word; ‘n Vise-Voorsitter, Sekretaris, Wedvlugsekretaris, Tesourier, Reklamebeampte, Vervoerbeampte, Ringbeampte en een afgevaardigde (verkieslik die Voorsitter) van elke geaffilieerde klub.

 

7.     DAGBESTUUR

 

            Die Dagbestuur bestaan uit:

            Die Voorsitter, Vise-Voorsitter, Sekretaris, Wedvlugsekretaris, Ringbeampte, Tesourier, Reklamebeampte en die Vervoerbeampte van die Assosiasie (indien laasgenoemde ‘n verteenwoordiger van ‘n geaffilieerde klub is).

 

8.     VERKIESING VAN AMPSDRAERS

 

8.1       Die Voorsitter van die Assosiasie sal jaarliks, tydens die Algemene Jaarvergadering, deur die teenwoordige Stemgeregtigde lede verkies word.

 

8.2       Die ander lede van die Dagbestuur sal jaarliks deur die Bestuurskomitee op die maandelikse vergadering gedurende Maart verkies word.

 

9.     STEMREG

 

            Die Dagbestuurslede en een afgevaardigde van elke klub sal stemreg op Bestuurskomiteevergaderings hê.  Indien die Vervoerbeampte ‘n verteenwoordiger van ‘n klub is, sal hy stemreg hê.  Indien buitestaanders in enige pos aangestel word, is hy ‘n werknemer van die Assosiasie en sal hy geen stemreg op die Bestuurskomiteevergadering of Dagbestuur hê nie.  Indien ‘n lid meer as een van die Dagbestuursposte beklee, sal hy slegs oor een stem beskik.  Die Voorsitter het op al die vergaderings ‘n beslissende stem.

 

10.    PLIGTE VAN DIE DAGBESTUUR

 

10.1      Voorsitter:

            Die Voorsitter is verantwoordelik vir die ordelike verloop van vergaderings en om spreukbeurte van lede te bepaal.

 

10.2     Vise-Voorsitter:

            Die Vise-Voorsitter moet die Voorsitter met raad en advies bystaan en hom op hoogte hou van al die Assosiasie se aktiwiteite.  Hy moet by die Voorsitter oorneem gedurende laasgenoemde se afwesigheid of op sy versoek.

 

10.3     Sekretaris:

            Die Sekretaris is verantwoordelik vir die opstel en uitstuur van agendas, die byhou en verspreiding van notules en al die korrespondensie van die Assosiasie, die Bestuurskomitee en Dagbestuur, en die aankoop en grafering van trofees.

 

10.4     Tesourier:

            Die Tesourier is verantwoordelik vir die boekhouding van die Assosiasie se geldsake, die invordering van gelde, uitbetaling van prysgelde, aankope en bestellings, die vereffening van rekenings en die opstel van finansiële state.

 

10.5     Wedvlugsekretaris:

            Die Wedvlugsekretaris is verantwoordelik om al die lede van die Assosiasie se afstande van die onderskeie klubs te verkry, kontrole by gesamentlike inkorwing en by loslatingspunte uit te oefen of te laat uitoefen, verwerking van wedvluguitslae en die beskikbaarstelling daarvan aan klubs.

 

 

10.6     Vervoerbeampte:

            Die Vervoerbeampte moet toesien dat die Assosiasie se vragmotor altyd padwaardig is, reëlings tref dat die wedvlugduiwemandjies by die verskillende klubs gehaal en afgelewer word, aanbevelings doen in verband met die aanstel van ‘n bestuurder vir die vragmotor en toesien dat daar gedurende die wedvlugseisoen wanneer inkorwing op Donderdae plaasvind, voldoende duiwekos op die vragmotor is.  Die Vervoerbeampte is verantwoordelik en aanspreeklik vir sy optrede aan die Dagbestuur.

 

10.7     Ringbeampte:

            Die Ringbeampte is verantwoordleik vir behoorlike kontrole oor die Assosiasie se voorrade en die opsporings van verdwaalde duiwe se eienaars.

 

11.    BEVOEGD- EN VERANTWOORDELIKHEDE VAN DIE BESTUURSKOMITEE

 

            Die Bestuurskomitee het die bevoegdheid om:

 

11.1      Sub-komitees aan te stel wat spesiale aangeleenthede hanteer, die dienste van sodanige komitees op te skort, indien opdragte nie na wense uitgevoer word nie, of om die opdrag aan sodanige komitees te wysig met dien verstande dat besluite of bevindinge van sub-komitees by die eerskomende vergadering van die bestuurskomitee voorgelê word vir wysiging of bekragtiging.

 

11.2      Indien geldige gronde bestaan, ‘n geaffilieerde klub of –lid van die Assosiasie te skors of sy lidmaatskap tydelik of permanent op te skort.

 

11.3      Grense vir doeleindes van die Assosiasie se wedvlugte te bepaal, vas te stel en aan die Algemene Jaarvergadering voor te lê vir bekragtiging.

 

11.4      Reëls, wat tot die voordeel van duiwewedvlugte en -skoue is, wat nie strydig is met die bepalings van die Konstitusie nie, neer te lê, te wysig of te herroep.  Sodanige nuwe reëls, wysigings of herroepings moet binne 30 dae skriftelik aan al die Assosiasie se geaffilieerde klubs bekend gemaak word.  Die onus rus op klubs om hulle lede daarvan in kennis te stel.

 

11.5      Bevoegdhede wat deur die Konstitusie aan die Bestuurskomitee verleen word, aan die Dagbestuur te delegeer.  Die Dagbestuur moet by die volgende vergadering aan die Bestuurskomitee verslag doen.

 

11.6      Toetreegelde in te stel, te wysig of terug te betaal.

 

11.7      Jaarliks uit die Assosiasie se fondse honorariums aan ampsdraers van die Assosiasie te bewillig.

 

11.8      Werknemers aan te stel, hulle vergoeding te bepaal en hulle dienste na goeddunke op te skort.

11.9      Namens die Assosiasie roerende en vaste eiendom aan te koop, te verkoop, te huur of te verhuur.

 

11.10    Die Assosiasie se fondse wat nie onmiddellik vir bedryfsdoeleindes benodig word nie na goeddunke te belê.

 

11.11    Namens die Assosiasie ‘n hofgeding in te stel, dit teen te staan, te laat vaar, te skik of enige geskil vir arbitrasie aan ‘n arbiter voor te lê.

 

11.12    Na goeddunke te vergader op sodanige plekke en tye soos en wanneer nodig geag.

 

11.13    In die algemeen die sake van die Assosiasie te administreer en om klubs te besoek wanneer inkorwing plaasvind of klokke gelees word, ten einde seker te maak dat die bepalings van die Konstitusie en reëls nagekom word, met dien verstande dat hierdie bevoegdhede gedelegeer mag word aan enige lid van die Bestuurskomitee.

 

11.14    Na gelang van omstandighede beperkings op die getal duiwe, wat deur indiwiduele lede ingekorf mag word, te plaas.

 

11.15    Jaarliks wedvlugprogramme vir die seisoen vas te stel volgens voorgestelde programme wat deur die geaffilieerde klubs voorgelê is.

 

11.16    Om ‘n geouditeerde finansiële verslag op die Algemene Jaarvergadering ter insae van al die lede beskikbaar te stel.

 

12.    PLIGTE EN BEVOEGDHEDE VAN DIE DAGBESTUUR

 

            Die Dagbestuur het die bevoegdheid om:

 

12.1      Enige stappe te neem wat nodig mag wees om ‘n wedvlug of wedvlugprogram suksesvol te laat verloop.

 

12.2     In geval van ‘n krisissituasie, alles moontlik in werking te stel vir ‘n spoedige oplossing daarvan.

 

12.3     Die bestuurder van die vragmotor se pligte op te stel en aan hom voor te lê.

 

12.4     In ‘n noodgeval enige lid van die Bestuurskomitee en/of enige ander lid, indien nodig, af te vaardig om ‘n wedvlugpunt te besoek om bv. reëlings te tref vir ‘n nuwe loslatingstyd wat moontlik eers die Sondag kan wees.

 

13.    ALGEMENE JAARVERGADERING

 

13.1      Die Algemene Jaarvergadering van die Assosiasie moet voor die einde van Februarie van elke jaar, op ‘n sentrale plek soos deur die bestuurskomitee bepaal, gehou word.

13.2     Besprekingspunte vir die vergadering moet jaarliks voor die 15de Januarie by die Assosiasie se Sekretaris ingehandig word.

 

13.3     Slegs lede wat die vorige seisoen kompeterende lede was en wie se ledegeld aan klubs en die Assosiasie ten volle opbetaal is, sal stemreg hê.

 

13.4     Die Agenda, waarin die datum, plek en tyd van die Algemene Jaarvergadering aangedui is, moet minstens 14 (veertien) dae voor die Vergadering, deur die Sekretaris van die Assosiasie, aan al die lede van die Assosiasie gesirkuleer word.

 

14.    BUITENGEWONE ALGEMENE VERGADERING

 

            ‘n Buitengewone Algemene Vergadering van die Assosiasie kan belê word wanneer:

 

14.1      Die Bestuurskomitee so besluit

 

14.2     Indien die helfte of meer van die geaffilieerde klubs so ‘n vergadering aanvra.  Elke klub moet skriftelik redes verstrek waarom die vergadering aangevra word.

 

15.    BESLUITE VAN DIE ALGEMENE JAARVERGADERING

 

            Besluite wat op die Algemene Jaarvergadering geneem is, kan alleenlik op ‘n Algemene Jaarvergadering of ‘n Buitengewone Algemene Vergadering, waarvoor daar minstens VEERTIEN DAE SKRIFTELIKE KENNIS aan al die lede van die Assosiasie gegee is, herroep, gewysig of ongeldig verklaar word.

 

16.    WYSIGING VAN DIE KONSTITUSIE

 

       BEPALINGS WAT IN HIERDIE KONSTITUSIE VERVAT IS, KAN SLEGS GEWYSIG, HERROEP OF VERANDER WORD MET DIE TOESTEMMING VAN ‘N TWEE-DERDE MEERDERHEID VAN DIE STEMGEREGTIGDE LEDE TEENWOORDIG BY ‘N ALGEMENE JAARVERGADERING OF BUITENGEWONE ALGEMENE VERGADERING WAT VIR HIERDIE DOEL BELê IS.

 

17.    REGISTRASIE VAN DUIWE

 

17.1      Indien ‘n lid met meer as een span duiwe aan wedvlugte deelneem, is dit nie nodig om die spanne te registreer nie.

 

17.2     Indien ‘n Junior lid uit dieselfde hok as ‘n gewone lid kompeteer, moet die junior lid se duiwe afsonderlik geregistreer word.

 

18.    HOKOPMETINGS

 

18.1      Elke geaffilieerde klub sal vir sy lede se hokopmetings en die aanvra van afstande verantwoordelik wees.

18.2     Enige besware in verband met die korrektheid van afstande moet binne 14 dae na die bekendmaking daarvan by die Klub Sekretaris ingedien word.

 

18.3     Geen hokafmetings sal gedurende ‘n wedvlugseisoen verander word nie.

 

18.4     Alle geaffilieerde lede moet eenvormige afstande van dieselfde “GPS” verkry.  Lede wat nie aan hierdie vereiste voldoen nie, sal op ‘n definitiewe nadeel kompeteer.

 

19.    VERDWAALDE DUIWE

 

19.1      Verdwaalde duiwe moet by die onderskeie klubs se ringbeamptes gerapporteer word.  Ringbeamptes wat verdwaalde duiwe se eienaars nie kan opspoor nie, moet die ringnommer aan die Assosiasie se Ringbeampte rapporteer.

 

19.2     Duiwe wat deur ‘n lid geregistreer of deur ‘n lid vir wedvlugte ingeskryf word, sal as die lid se bona fide eiendom beskou word.  Duiwe van lede van die Assosiasie kan egter nie sonder die skriftelike toestemming van die geregistreerde eienaar die eiendom van ‘n ander lid word nie.

 

20.       RINGE

 

20.1     Geen klub sal van ringe voorsien word voordat sodanige klub se finansiële verpligtinge teenoor die Assosiasie ten volle nagekom is nie.

 

20.2     Elke duif wat aan ‘n wedvlug deelneem moet met ‘n aanvaarde wedvlugring, waarvan die letters en syfers duidelik leesbaar is, gering wees.

 

20.3     Duiwe met gesplete of beskadigde ringe mag nie aan wedvlugte deelneem nie.

 

20.4     Duiwe met ringe van ander Assosiasies of Unies, wat aan die vereistes voldoen, mag in die WRRPA kompeteer.

 

20.5     Die Hoofkwartier van die Assosiasie sal wees die adres van die Sekretaris.

 

21.       REG TOT APPéL

            Indien ‘n lid nie tevrede is met beslissing van sy klub nie, moet hy/sy eers na sy Klub-komitee appelleer alvorens daar na die WRRPA Bestuurskomitee geappelleer kan word.

 

21.1      Appél teen besluite of opdragte van geaffilieerde klubs:  Enige lid kan by die Bestuurskomitee appelleer teen ‘n besluit of opdrag van die geaffilieerde klub waarvan hy ‘n lid is, op voorwaarde dat:

 

v                  Sodanige appél tesame met die redes daarvoor en enige ondersteunende dokumente binne 14 dae na die insident skriftelik by die Sekretaris van die Assosiasie ingedien word.  Indien die appél nie binne genoemde tydperk ingelewer word nie, sal die reg van appél verval.

 

v                  Indien enige persoon wat deelgeneem het aan die verrigtinge van die klub wat vir sodanige beslissings of opdrag verantwoordelik was, ‘n verteenwoordiger in die Bestuurskomitee is, moet hy hom by die aanhoor van sodanige appél,nadat hy sy saakgestel het, onttrek.

 

v                  Elke appél moet vergesel wees van ‘n deposito van R10,00 wat sal dien as vergoeding van koste.  Sodanige vergoeding sal betaalbaar wees ongeag die uitslag van die appél.

 

v                  Sodanige appél sal verhoor word op die volgende vergadering van die Bestuurskomitee en sy besluit sal finaal en bindend wees.

 

v                  Enige appellant sal die reg hê om persoonlik voor die Bestuurskomitee te verskyn ten einde:

 

*          ‘n Mondelinge verklaring aft e lê ter ondersteuning van die geskrewe appél

*          Die lede van die Bestuurskomitee in staat stel om, indien hulle dit so verkies, die appellant te ondervra aangaande enige geleentheid waarna verwys is in die saak waarop die appél betrekking het.

*          Die Bestuurskomitee mag die appellant versoek om persoonlik voor die Komitee te verskyn.

*          Indien enige appellant nalaat om te verskyn op die neergelegte tyd mag met die appél voortgegaan word of mag dit summier na die oordeel van die Bestuur verwerp word; en

*          Die werwing van temme in appél-gevalle sal die klub of lid blootstel aan skorsing of uitsetting.

 

ONTBINDING VAN DIE ASSOSIASIE

 

1.          Die Assosiasie ontbind wanneer minstens 75% van die geaffilieerde lede hulle toestemming skriftelik daartoe verleen.

 

2.         Indien die Assosiasie sou ontbind, sal al sy bates teen die voordeligste manier van die hand gesit word en die opbrengs gelykop tussen al die geaffilieerde lede van die Assosiasie verdeel word.

 

3.         Lede wat minder as een (1) jaar geaffilieerde lede van die Assosiasie is, word van die verdeling uitgesluit.

 

4.         ‘n Lid wat verhuis buite die grense van die Assosiasie se lidmaatskap sal outomaties verval en so ‘n lid sal geen aanspraak op verdere voordele van die Assosiasie hê nie.


 Terug na bo

 

 

 

 

 

A L G E M E N E  R E ë L S

 

1.          Geen klub se reëls mag teenstrydig wees met dié van die Assosiasie nie.

 

2.         Die Assosiasie se Komitees moet die huishoudelike Konstitusie en reëls van elke geaffilieerde klub respekteer en mag nie in die huishoudelike reëls van enige geaffilieerde klub inmeng of besluite neem wat sodanige klub of sy lede kan benadeel nie.  Daar moet streng toegesien word dat die reëls in die Konstitusie nagekom word.

 

3.         ‘n Geaffilieerde klub wat nalaat om gedurende ‘n wedvlugseisoen sy finansiële verpligtinge teenoor die Assosiasie na te kom, kan verbied word om aan verdere wedvlugte deel te neem.

 

4.         Enige moedswillige verontagsaming van enige van die reëls en die Konstitusie sal in ‘n baie ernstige lig beskou word.

 

5.         Enige geaffilieerde lid wat onsportief optree, onenigheid veroorsaak, of vuil taal in ‘n klubsaal gebruik, loop die risiko om geskors te word.

 

6.         Die Sekretarisse van die onderskeie Komitees is verantwoordelik om volledige notules van elke vergadering te hou.  Notules moet behoorlik bekragtig word deur ondertekening daarvan deur die Voorsitter en Sekretaris.

 

7.         Enige lid wat die Assosiasie lank en getrou gedien het, of enige lid wat lang en verdienstelike diens aan die wedvlugduiwesport gelewer het, kan op aanbeveling van die Bestuurskomitee by ‘n jaarlikse algemene vergadering tot lewenslange Ere-lid van die Assosiasie aangewys word.

 

8.         Geen lid het aanspraak op eiendom of fondse van die Assosiasie nie.

 

9.         Waar ‘n duiwehok deur ‘n vennootskap besit of beheer word, sal sodanige vennote in alle gevalle as ‘n entiteit beskou word met slegs een stem.

 

10.       Indien enige lid in gebreke bly om sy jaarlikse ledegeld te betaal voor of op die aand van inkorwing van die eerste wedvlug in Junie, sal sodanige lid se lidmaatskap verval.

 

11.        In die geval van twyfel met betrekking tot die betekenis, vertolking of toepassing van hierdie reëls en bepalinge van die Konstitusie is die vertolking van die Bestuurskomitee finaal en bindend op alle lede.

Terug na bo